O vindeiro 6 de novembro celebraremos a Conferencia Final do Proxecto BlueWWater, en horario de 10.00 h a 17.00 h (GMT+1), nas instalacións do Centro Tecnolóxico do Mar – Fundación CETMAR. O evento terá formato híbrido, permitindo a participación presencial e en liña.

A xornada terá como obxectivo presentar os principais resultados e logros acadados no proxecto, así como compartir as experiencias e os coñecementos desenvolvidos polo consorcio ao longo destes tres anos de colaboración transfronteiriza.

Durante a xornada presentaranse, entre outros aspectos, metodoloxías analíticas de alto rendemento para a avaliación de contaminantes, os resultados obtidos en mostras de augas superficiais e augas residuais urbanas, a avaliación do seu impacto ambiental e a eficacia de sistemas de tratamento convencionais e avanzados para mellorar a súa eliminación nas estacións depuradoras de augas residuais (EDAR).

A conferencia permitirá abrir un espazo de diálogo e intercambio de experiencias entre as persoas participantes, así como afondar nos retos actuais e futuros da xestión da calidade da auga, co obxectivo de avanzar cara a un uso máis sostible dos recursos hídricos.

O proxecto BlueWWater é un proxecto de cooperación transfronteiriza financiado polo Programa POCTEP de Cooperación Galicia–Norte de Portugal 2021–2027.

Inscrición de participantes: https://cetmar.org/seminarios/conferencia-final-bluewwater/

Programa preliminar da conferencia: Descargar o programa.